Yüksək bal toplayanlar buna görə universitetə girə bilmədi - 620 bal toplayan da... 

600-dən yuxarı bal toplayan 10 abituriyent ali məktəblərə qəbul ola bilməyib. Onların əksəriyyəti IV ixtisas qrupunda tibbi ixtisası seçənlər olub.

Təhsil ekspertlərinin sözlərinə görə, yüksək bal toplasalar da, tələbə adını qazana bilməyənlərin əsas səbəblərindən biri ərizələrində məhdud sayda ixtisas kodu göstərmələridir.

Təhsil eksperti Kamran Əsədov bildirib ki, bir çox abituriyentlər Dövlət İmtahan Mərkəzinin dərc etdiyi "Abituriyent" jurnalında əvvəlki illərin ballarına baxaraq seçim edirlər. Lakin plan yerləri və real statistikaya nəzər yetirmədən yalnız müəyyən ixtisasları yazmaları onların müsabiqədən kənarda qalmasına gətirib çıxarır.

Onun sözlərinə görə, hətta 620 bal toplayan abituriyent belə hüquq ixtisasına qəbul ola bilməyib:

"Abituriyentlər topladıqları balın əvvəlki illərdə həmin ixtisaslara qəbul üçün kifayət etdiyini düşünürlər. Amma nəzərə almırlar ki, hər il plan yerlərinin sayı və digər namizədlərin göstəriciləri dəyişir".

Digər təhsil eksperti Adil Vəliyev isə qeyd edib ki, bəzi abituriyentlərin yalnız bir məqsədi olub - konkret bir universitetdə konkret bir ixtisas üzrə oxumaq.

"Onlar seçim zamanı alternativ ixtisasları göstərməyiblər. Nəticədə, qəbul ola bilməyiblər. Bu halda həmin abituriyentlər yüksək nəticələrini qoruyub növbəti il yenidən şanslarını sınaya bilərlər", - deyə o əlavə edib.

Ekspertlər gələcəkdə abituriyentlərə daha geniş seçim etməyi və statistik göstəriciləri diqqətlə nəzərdən keçirməyi tövsiyə ediblər. //Baku TV