Almaq istədiyiniz məhsulun üzərində qiymət yoxdursa... - Hüquqşünasdan AÇIQLAMA 

Vətəndaşlar bəzən satılan məhsulların üzərində qiymət göstəricilərinin olmaması ilə rastlaşırlar. Bu hala, xüsusilə, bazar, kiçik mağaza, köşk və s. tipli satış məntəqələrində rast gəlinir. Həmin yerlərdə fəaliyyət göstərən satıcıların məqsədi müştərinin görünüşünə uyğun qiymət təyin etməkdir ki, bu da istehlakçı haqlarının pozulması deməkdir.

Mövzu ilə bağlı hüquqşünas Əkrəm Həsənov Referans.az-a bildirib ki, məhsulların qiymətinin üzərində qeyd olunması məsələsi qanunda da öz əksini tapıb və buna əməl etməyənləri cərimə gözləyir.

“Pərakəndə ticarət nöqtələrində və ictimai iaşə obyektlərində satılan məhsulların qiymətləri mütləq üzərində olmalıdır. Bu həm istehlakçıların hüquqlarının müdafiəsi qaydalarından irəli gəlir, həm də Nazirlər Kabinetinin bu tip pərakəndə alış-verişin tənzimlənməsi qaydalarında əks olunub. Məhsulun satış qiymətini üzərinə yazmayan şəxslər qanunu pozur. Bu şəxslərlə bağlı İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tədbirlər görə bilər, cərimələr tətbiq oluna bilər. Hətta vətəndaş belə hallarla qarşılaşdıqda məhkəməyə də müraciət edə bilər. Vergi orqanları da bununla bağlı müəyyən işlər görə bilər, çünki belə hallarda vergidən yayınma da ola bilər. Vətəndaş alqı-satqı prosesində bir növ satıcı ilə müqavilə bağlıyır. Bu, şifahi müqavilədir. Şifahi müqavilə bir tərəfin təklifi, digərinin isə qəbulu nəticəsində bağlanır. Buna Mülki hüquqda da oferta (təklif) və aksept (qəbul) deyilir. Biz məhsula baxırıq, bəyənirik, qiymətinə nəzər yetiririk, əgər qiyməti də bizə uyğundursa, kassaya gedirik və bu o deməkdir ki, biz bunu qəbul etdik. Amma qiymət üzərində olmasa biz onu qəbul edə bilmərik. Buna görə də pərakəndə satış nöqtələrində mütləq məhsulların qiyməti göstərilməlidir”.

Fidan Vəlisoy